Concentración Afectados por Comunidades de Montes-Ifevi

Un centenar de persoas maniféstanse ante o Ifevi contra o espolio das súas propiedades polos comuneiros de Cabral

Vigo, 28 de xaneiro de 2024.- Ao redor dun cento de persoas concentráronse hoxe ante o Instituto Feiral de Vigo (Ifevi), aproveitando que se celebraba alí unha asemblea da Comunidade de Montes en Man Común Santa Mariña de Cabral, para amosar de novo a súa indignación ante o espolio que está a protagonizar esta entidade con parcelas de empresas e particulares.

A protesta transcorreu sen incidentes, entre berros contra a inseguridade xurídica que están a provocar as reclamacións dos comuneiros e demandas de intervención ás administracións competentes.

A Plataforma Galega de Afectados por Comunidades de Montes decidira convocar a concentración tras coñecerse estes días a decisión do Tribunal Superior de Xustiza de Galicia de non admitir o recurso de casación interposto por dous irmáns contra a sentencia que outorgou á CC MM de Cabral a titularidade dun terreo de Cotogrande que eles herdaran de varias xeracións atrás. A Comunidade de Montes de Cabral lograra desde xeito por primeira vez que se convertera en firme unha resolución xudicial que lle dá a propiedade dunha parcela que estaba en mans de particulares, un procedemento que chegou ao seu final a pesar de que o presidente da entidade sempre defendeu publicamente que eles só reclamarían títulos a administracións ou empresas, e que non irían a por donos de pequenos predios.

Os dous irmáns afectados participaron na protesta de hoxe xunto con empresarios que teñen ameazada a viabilidade das súas industrias en distintos concellos do sur de Vigo por conflitos similares, así como con outros propietarios particulares de Cabral que están a sufrir igualmente o acoso dos comuneiros.

O argumento das CC MM para lograr a titularidade das parcelas e expulsar delas aos seus actuais donos é sempre o mesmo: que a propiedade do monte é deles dende tempo inmemorial e que esta quedou plasmada en levantamentos administrativos da última década do século XIX. Os particulares afectados teñen títulos que se remontan a principios do século XX ou, como no caso dos dous irmáns desa primeira sentenza firme, unha inscrición no Rexistro da Propiedade de varias décadas atrás. Como o resto de veciños demandados, eles tamén estiveron moitos anos posuíndo sen problemas o terreo ata que a comunidade de montes comezou inesperadamente a súa campaña de reclamacións.

A presidenta da Plataforma, Beatriz Ucha, que liderou a concentración, defendeu que “o pesadelo que estamos a sufrir moitos veciños de Cabral, Mos, Salvaterra e moitos outros concellos galegos pola presión e cobiza dalgunhas comunidades de montes esixe unha intervención urxente das administracións, porque esta inxustiza, esta inseguridade xurídica fronte aos posuidores de títulos rexistrais, vai seguir estendéndose por Galicia se non hai esa resposta”.

Deja un comentario

Tu dirección de correo electrónico no será publicada. Los campos obligatorios están marcados con *